Ipinagdiwang sa Orion, Bataan ang ika-236 Araw ng Kapanganakan ni Francisco “Balagtas” Baltazar nitong Martes (Abril 2, 2024), bilang bahagi ng Buwan ng Panitikan at Wikang Filipino. Ang temang “Si Balagtas at ang Kaniyang Pluma sa Kapayapaan” ay naging pangunahing saligan ng pagdiriwang na pinangunahan ng Komisyon sa Wikang Filipino (KWF).
Dumalo sa nasabing pagdiriwang sina Antonio L. Raymundo, Jr. (Alkalde ng Orion), mga kinatawan nina Jose Enrique S. Garcia III (Gobernador ng Bataan), Albert Raymond S. Garcia (Kinatawan ng Ika-2 Distrito ng Bataan), at Arthur P. Casanova (Tagapangulo ng KWF), kasama ang iba pang mga opisyal.
Nakibahagi rin sa pagdiriwang ang mga residente mula sa Pandacan, Maynila, at Balagtas, Bulacan, kung saan ipinanganak si Balagtas. Kilala ang bayan ng Orion noon bilang Odiong at ang Bigaa, Bulacan naman ay dating pangalang Balagtas. Ang asawa ni Balagtas ay tubong San Vicente, Orion, Bataan.
Sa mensahe ng mga opisyal, ipinahayag nila ang kasiyahan sa matagumpay na pagdiriwang kahit sa mainit na panahon. Binigyang-diin din ang kahalagahan ng panitikan sa paghubog ng kaisipan ng mamamayan at sa pagbuo ng mapayapang lipunan.
Nagpahayag ng pasasalamat si Dr. Casanova sa mga sumuporta sa pagdiriwang, kasama na ang National Book Development Board, National Commission on Culture and Arts, at Alkalde Antonio Raymundo, Jr. Binigyang-pugay din ang dakilang ambag ni Balagtas sa panitikan, partikular sa kanyang obra maestra na “Florante at Laura,” na naglalaman ng pagtuligsa sa katiwalian sa lipunan.
Sa kabuuan, ang pagdiriwang ng Araw ni Balagtas ay nagpapakita ng pagpapahalaga sa kanyang kontribusyon sa larangan ng panitikan at wikang Filipino. Patuloy ang pag-aaral at pagpapahalaga sa kanyang mga akda bilang bahagi ng kasaysayan at kultura ng bansa. (Photo by: Jimmy Camba)
