Hinimok ni Atty. Domingo Alidon ng National Employees’ Union ang ilang opisyal ng DepEd na huwag pigilan ang pagpapatuloy ng ratipikasyon ng Collective Negotiation Agreement (CNA) para sa non-teaching personnel.
Paliwanag niya, kumpleto at malinaw ang proseso ng CNA—mula sa pagpirma ng unyon at pamunuan, pagpapanotaryo, pangangalap ng lagda ng mga empleyado, hanggang sa pagsusumite sa CSC para sa ratification number. Kailangan ang 50% + 1 na pirma para ito ay maaprubahan.
Nag-aalangan naman ang ilang empleyado na lumagda dahil hinihintay pa umano ang division memorandum, na ayon sa unyon ay hindi naman kailangan. Binigyang-diin din ni Alidon na ang panghihimasok ng ilang opisyal ay hindi kinakailangan dahil ang CNA ay kasunduan sa pagitan ng unyon at pamunuan.
Ang halaga ng CNA incentive ay batay sa savings ng ahensya. Noong nakaraang taon, unang beses na nakapagbigay ang DepEd ng P10,000, at hiling ngayon ng unyon na ito ay maitaas sa P15,000. Kahit hindi miyembro ng unyon, maaaring makatanggap ng benepisyo ang non-teaching personnel ngunit may bawas na agency fee.
May ilang tanggapan din umano ang hindi nagre-remit ng savings sa Central Office, dahilan ng kakulangan ng pondo. Kapag hindi ito nagamit bago mag-December 31, ibabalik ito sa National Treasury. Sa 65,000 non-teaching personnel, 58,900 ang miyembro ng unyon.
Ngayong taon din ang pinakamalaking National Congress ng unyon matapos hindi makagawa ng cluster assemblies.
Hiling ng unyon: hayaan ang mga empleyado na lumagda at tapusin ang proseso upang matiyak ang insentibong nararapat sa kanila.
