,
San Juan City – Pormal nang binuksan at binasbasan ng Pamahalaang Lungsod ng San Juan ang Makabagong San Juan National Government Center (NGC) noong Agosto 7, 2025. Isinagawa ang isang maikling programa sa Makabagong San Juan Theater sa ika-4 na palapag ng gusali.
Pinangunahan ang seremonya nina Mayor Francis Zamora, Congresswoman Bel Zamora, Vice Mayor Angelo Agcaoili, mga miyembro ng Sangguniang Panlungsod, at mga pinuno ng iba’t ibang departamento ng lungsod.
“Ikinararangal kong sabihin na tunay na world-class ang pasilidad na ito. Dito pa nga isinagawa ang Post-SONA meetings kung saan nagkaroon ng mga breakout session ang mga kalihim ng Gabinete. Hindi ko akalaing magkakaroon tayo ng ganitong klaseng pasilidad. Ito ang unang groundbreaking na pinangunahan ko bilang bagong halal na alkalde. Layunin naming magkaroon ng one-stop shop para sa mga serbisyong pambansa—at ngayon, katuparan na ito, salamat kay Pangulong Marcos at sa Bagong Pilipinas eGov PH Hub,” ayon kay Mayor Zamora.
“Ang pondong ginamit sa pagpapatayo ng NGC ay mula sa pambansang pamahalaan, na aking hiniling simula pa noong 2023. May karagdagan pa tayong pondo para sa mga natitirang bahagi ng gusali sa susunod na taon. Salamat kay Mayor Zamora sa ating mga nagawa, at sa mamamayan sa patuloy na suporta. Magpapatuloy kami sa pagseserbisyo para sa San Juan,” sabi naman ni Congresswoman Bel Zamora.
Matapos ang programa, isinagawa ang pagbabasbas at pagbubukas ng mga commemorative marker sa bawat bahagi ng gusali. Nagsimula ito sa ika-4 na palapag (sa teatro) pababa hanggang ground floor, kung saan binasbasan din ang District Office ni Congresswoman Zamora sa ika-3 palapag.
Ang gusaling ito ay may 6 na palapag, may lower ground level at basement parking, at nagkakahalaga ng ₱1,013,425,000.00. Layunin nitong gawing mas madali para sa mga San Juaneño ang pag-access sa mga ahensya ng pambansang pamahalaan.
Sa kasalukuyan, narito na ang Bagong Pilipinas eGov PH Serbisyo Hub at inaasahan na mas marami pang national government offices ang lilipat dito.
Isa sa mga tampok ng gusali ay ang Makabagong San Juan Theater—isang makabagong tanghalan na may kabuuang 876 na upuan (468 sa ibaba at 408 sa balcony). Kumpleto ito sa retractable curtains, projector at screen, built-in na professional sound system, at dalawang dressing room. Ito ay lugar para sa pagtatanghal ng talento at sining ng mga San Juaneño.
Mula 1st hanggang 3rd floor, mayroong 15 opisina kada palapag para sa mga national agencies at kaakibat na serbisyo. Kasama rin sa gusali ang bagong Barangay Hall ng Barangay St. Joseph at isang air-conditioned basketball court na maaaring gamitin para sa mga palaro at aktibidad ng komunidad.
“Ang National Government Center na ito ay patunay ng aming layunin na ilapit ang mga serbisyo ng pamahalaan sa mamamayan. Hindi na kailangang bumiyahe pa ng malayo ang mga San Juaneño. Para ito sa inyo—madali puntahan, kumpleto sa gamit, at makabago,” dagdag pa ni Mayor Zamora.
