QUEZON CITY – Inihayag ni Dr. John J. Chiong, founder at presidente ng Task Force Kasanag International (TFK), na nagsampa sila ng mga kasong kriminal at administratibo laban kay Pasig City Mayor Victor Ma. Regis “Vico” Sotto at iba pang mga opisyal ng lungsod. Ang mga kasong ito ay may kaugnayan sa umano’y hindi tamang pagkilos bilang isang pampublikong opisyal, malubhang maling pag-uugali, kapabayaan sa tungkulin, at paglabag sa mga patakaran ng Civil Service Commission.
Kabilang sa mga kinasuhan ay sina Priscella Mejillano (OIC ng Pasig City Planning and Development Office), City Engineer Mamerto Mesina, Artaxerxes V. Geronimo (City Electrical Office), Marita A. Calaje (City Treasurer’s Office), Atty. Jeronimo Manzanero (City Administrator’s Office), Robert Mina (City Assessor’s Office), at Engr. Noel Agustin (Office of the Building Official).
Sa isang press conference, sinabi ni Dr. Chiong na ang mga kasong ito ay isinampa noong Marso 18, 2024. Nauna nang nagsampa ang TFK ng kasong kriminal noong Nobyembre 22, 2023. Ipinunto ni Dr. Chiong na ito ay dahil sa umano’y pang-aabuso ng kapangyarihan ni Mayor Sotto sa mga pribadong negosyante.
“Napilitan kaming maghain ng kaso sa Ombudsman dahil walang puwang ang pang-aabuso sa gobyerno,” ani Dr. Chiong. Dagdag pa niya, tinatawagan niya ang publiko na itigil ang pagpapalaki ng isyu at bigyan ng mas magandang serbisyo ang mga taga-Pasig.
Ayon sa kanya, may mga bagong ebidensya silang nakalap na nagpapatibay sa mga kaso. Isa pang reklamo laban kay Mayor Sotto ay may kaugnayan sa umano’y sobrang mahal na PHP9.6-bilyong Pasig City Hall Complex, na ayon kay Engr. Lao, masyadong mataas ang presyo kumpara sa aktwal na halaga ng proyekto.
Bukod sa isyu ng overpricing, inilahad din ni Engr. Lao ang umano’y pang-aabuso ni Mayor Sotto sa pamamagitan ng pagpapahirap sa negosyo ng kanilang pamilya at pagprotekta sa mga illegal na aktibidad tulad ng droga sa Pasig. Ayon kay Lao, sinubukan nilang makipag-ayos sa pamahalaang lokal, ngunit hindi sila pinansin ni Mayor Sotto. “Kung nilapitan lang sana ako ni Mayor Vico, walang problema sana,” ani Lao.
Ipinahayag ni Dr. Chiong na ang kanilang layunin ay labanan ang korapsyon at tiyakin na ang bawat pampublikong opisyal ay mananagot sa kanilang mga aksyon. Sinabi rin niya na ipapaubaya nila sa Ombudsman ang desisyon sa mga kasong ito.
“Nananawagan kami na kung may mali, dapat ito’y itama. Walang sinuman ang mas mataas sa batas,” pagtatapos ni Dr. Chiong.
