QUEZON CITY – Ilang araw bago ang Chinese New Year, sinimulan ng Pamahalaang Lungsod ng Quezon ang selebrasyon sa Chinatown ng lungsod sa Banawe noong Biyernes, Enero 24. Layon nitong itaguyod ang lokal na turismo sa pamamagitan ng pagpapakita ng kasaysayan, kultura, at modernong atraksyon sa lugar.
Sa ginanap na press conference sa isang restaurant sa lungsod, sinabi ni Quezon City Mayor Josefina “Joy” Belmonte na ang pagdiriwang ay magsisimula sa “Chinatown Food Crawl and Media Launch,” kung saan ipapakita ang mayamang pamanang pang-kulinariya ng Banawe. Hinimok niya ang lahat na suportahan ang pagdiriwang ng Chinese New Year sa Chinatown ng lungsod.
Ibinahagi rin ni Belmonte na siya mismo ay may dugong Tsino. Idinagdag niya na minimal lamang ang inilaan nilang badyet na P1.5 milyon para sa selebrasyon dahil sa suporta ng mga negosyanteng Filipino-Chinese. Matagal na niyang sinusuportahan ang pagdiriwang na ito mula pa noong siya ay Vice Mayor ng lungsod.
Ayon kay Joel Distrajo mula sa Office of the City Administrator, isang araw lang ipagdiriwang ang Chinese New Year sa Banawe, kaya walang parada sa taon na ito. Gayunpaman, inaasahang may 50 exhibitors na makikibahagi sa pagdiriwang. Hinikayat din niya ang mga kalahok na maging “eco-friendly” bilang suporta sa programa ng lungsod para sa isang luntiang kapaligiran.
Ang QC Chinatown ay isa sa pinakamalalaki sa mundo na may lawak na limang ektarya. Ayon kay Charles Chen, Chairman ng QC Chinatown Development Foundation, Inc., nais nilang gawing pangunahing destinasyon ang Banawe sa Metro Manila. Sinabi rin ni Benjamin Co, Secretary General ng foundation, na hindi nila tatalakayin ang geopolitika o ang isyu sa West Philippine Sea sa selebrasyon.
Tiniyak naman ni Col. Melecio Maddatu Buslig, Jr., Acting District Director ng Quezon City Police District, na magpapakalat sila ng 300 pulis upang siguruhin ang seguridad sa lugar sa koordinasyon kay Gen. Elmo DG. San Diego (Ret.), DPOS Head.
Sinabi ni Giana Aira A. Barata, Acting Chief ng Tourism Operations Office, na hindi lang kilala ang Banawe sa mga auto parts kundi pati na rin sa masasarap na pagkaing Tsino. Isa rin ang pagpapaunlad at pagpapaganda ng Banawe sa mga prayoridad ng lokal na pamahalaan upang higit pang pagtibayin ang kulturang Tsino sa lugar.
Bilang bahagi ng selebrasyon, limang piling Chinese restaurants sa Banawe ang lumahok sa “food crawl.” Ang mga kalahok ay tinikman ang mga specialty dishes ng bawat kainan, kabilang ang:
-
JIN HOKKI Dumpling
-
Fong Wei Wu (Authentic Taiwanese Cuisine)
-
Ylaya Maki & Lumpia Restaurant (Itinatag noong 1960)
-
Tasty Dumplings (Sikat sa pork chop dishes)
-
Jin Hokki Dumpling at Muy Hong (May 30 taon nang naghahain ng Amoy fresh lumpia, oyster cake, at kikiam)
Ang limang restaurant ay malalapit lamang sa isa’t isa, nasa 10 metro ang pagitan. Ang food crawl ay may layuning ipakita ang pinakamahuhusay na pagkaing Tsino nang hindi nasosobrahan ang mga kalahok sa dami ng pagkain.
Ipagdiriwang ang Chinese New Year sa Enero 29 sa loob lamang ng isang araw, dahil may pasok sa opisina at eskwela kinabukasan. Noong nakaraang taon, tatlong araw ang naging selebrasyon sa Banawe.
Sa pamamagitan ng taunang pagdiriwang na ito, patuloy na pinapalakas ng Quezon City Government ang turismo, negosyo, at kultura sa Chinatown ng lungsod.
