Nilinaw ni San Juan Rep. Bel Zamora na hindi nilalabag ng Kamara ang utos ng Senate impeachment court kaugnay ng kaso laban kay Vice President Sara Duterte.
Sa pagdiriwang ng ika-127 Araw ng Kalayaan sa Pinaglabanan Shrine sa San Juan City, sinabi ni Zamora na bilang mga tagausig, tungkulin nilang sundin ang batas at ang impeachment court.
“Hindi kami sumusuway. Ayon sa Konstitusyon, kapag naipasa na ang articles of impeachment, tungkulin ng Senado na magsimula ng paglilitis,” ani Zamora.
Tinuligsa rin niya ang desisyon ng Senado na isauli ang articles of impeachment. Aniya, walang kapangyarihan ang Senado sa ilalim ng Konstitusyon para gawin ito.
“Naglabas na sila ng summons, kaya hindi lohikal na isauli pa ang articles. Kailangan ’yon para masagot ng Bise Presidente,” paliwanag niya.
Kinuwestyon din ni Zamora kung bakit kinukuwestyon ng Senado ang proseso ng Kamara gayong dumaan ito sa tamang hakbang.
“Sumunod kami sa panuntunan ng Kamara. Bakit nila kami kinukuwestyon?” dagdag niya.
Ayon kay Zamora, kahit naka-adjourn ang Senado, tuloy ang proseso. May 10 araw ang Bise Presidente para sumagot, at may 5 araw ang Kamara.
Noong Martes, bumoto ang Senado na isauli — pero hindi ibasura — ang articles of impeachment laban kay VP Duterte. Noong Pebrero, inaprubahan ng Kamara ang impeachment sa botong 215.
Kinasuhan si Duterte ng katiwalian, paglabag sa Konstitusyon, at maling paggamit ng P612.5 milyon confidential at intelligence funds ng Office of the Vice President at Department of Education.
