Isinusulong ni Marikina 1st District Representative Marcelino “Marcy” Teodoro ang paggamit ng teknolohiya sa mga pampublikong paaralan upang matiyak na ang bawat batang Pilipino ay may kakayahang makasabay sa digital na panahon. Sa pamamagitan ng panukalang batas na inihain niya sa Kongreso, layunin ni Teodoro na gawing mas moderno, mas accessible, at mas inklusibo ang edukasyon para sa lahat.
Noong Hulyo 2, inihain ni Teodoro ang House Bill No. 1255 na naglalayong magtatag ng Public Schools of the Future in Technology (PSOFT). Layunin ng panukalang ito na tugunan ang kakulangan sa access sa digital tools tulad ng laptops, internet, at smart classrooms—mga bagay na hindi pa abot ng maraming estudyante sa bansa.
“Ang teknolohiya ay bahagi na ng pang-araw-araw na buhay. Kung hindi tayo kikilos ngayon, baka maiwan ang mga estudyanteng Pilipino sa likod—hindi dahil sa kakulangan ng talino kundi dahil sa kakulangan sa kagamitan,” ayon kay Teodoro.
Sa ilalim ng panukala, bawat estudyante sa PSOFT schools ay bibigyan ng sariling laptop, magkakaroon ng internet access, at matututo sa mga digitally equipped classrooms gamit ang mga interactive boards at online learning platforms.
Layunin ng panukala na mapantayan ng mga batang Pilipino ang antas ng edukasyon sa mga mas maunlad na bansa. “Ang PSOFT ay magiging paraan para masigurong kahit ang mga estudyanteng nasa liblib na lugar, may kapansanan, o nasa conflict areas ay may pantay na oportunidad na matuto,” dagdag ni Teodoro.
Bukod sa mas magandang access sa edukasyon, binanggit rin ni Teodoro na mas magiging masaya at interaktibo ang pag-aaral ng mga bata gamit ang digital learning tools tulad ng e-textbooks at video lessons.
Ang panukalang ito ay tumutugma rin sa programa ni Pangulong Ferdinand Marcos Jr. na gawing digital ang Pilipinas. Sa pamamagitan ng PSOFT, layunin ni Teodoro na ihanda ang mga kabataang Pilipino para sa mga trabaho at hamon ng hinaharap sa isang digital na mundo.
