INCHEON, South Korea — Nagwagi bilang Grand Prix Champion ang PCSO Chorale sa Korea International Choir Competition 2026 na ginanap sa Incheon National University noong Marso 1, matapos talunin ang 47 chorale mula sa iba’t ibang bansa.
Nakamit ng grupo ang kampeonato sa finals sa pamamagitan ng pag-awit ng “Puer Natus in Bethlehem” at “Te Lucis Ante Terminum,” sa harap ng 14 na huradong eksperto sa choral music. Nag-uwi rin ito ng gold medals sa Sacred Music at Mixed categories.
Bilang Grand Prix winner, kwalipikado ang PCSO Chorale sa Asia Choral Grand Prix. Samantala, nagkamit ang Central Bicol State University ng gold sa Pop and Jazz at silver sa Mixed category.
Tinanghal na Best Conductor si Eunmi Yu ng Gyeyang District Boys and Girls Choir, habang Best Choreography ang The Children’s Choir of the Ekaterinburg State Opera and Ballet Theater ng Russia.
Pinamunuan ang PCSO Chorale nina Robert Delgado at Tristan Ignacio. Ayon kay Melquiades Robles, General Manager ng Philippine Charity Sweepstakes Office, unang international competition ito ng grupo.
Itinatag noong 1998 at binuhay muli noong 2023, ang PCSO Chorale ay binubuo ng mga empleyado ng ahensya. Ang Korea International Choir Competition, na unang inilunsad sa Songdo, ay isang pangunahing pandaigdigang choral event na may mga kompetisyon at workshops.
Gaganapin ang ika-7 Asia Choral Grand Prix sa Maynila sa Agosto 2027, kung saan muling kakatawanin ng PCSO Chorale ang Pilipinas.
Facebook Comments
