QUEZON CITY — Binigyang-diin ng National Council for Children’s Television (NCCT) at ni Education Secretary Juan Edgardo “Sonny” Angara ang pangangailangang tiyakin ang ligtas, makabuluhan at angkop na media environment para sa mga bata sa gitna ng mabilis na pagbabago ng teknolohiya, paglaganap ng social media at paggamit ng artificial intelligence (AI).
Ito ang naging sentro ng ikalawang araw ng apat na araw na Philippine Conference on Children and Media 2026 na binuksan ng NCCT noong Oktubre 26 sa Novotel, Quezon City, sa temang “Building a Safe, Dynamic, and Child-Friendly Media Environment.” Nagsimula ang kumperensiya noong Oktubre 25 at magtatapos sa Oktubre 28.
Sa kanyang pambungad na mensahe, sinabi ni Angara na napapanahon ang kumperensiya dahil malaki na ang ipinagbago ng paraan ng pagkuha ng mga bata ng impormasyon at balita. Kung noon ay pangunahing pinagmumulan ng impormasyon ang telebisyon, ngayon ay napakarami nang mapagpipilian dahil sa social media at iba pang digital platform.
Binigyang-diin ng kalihim na ibang-iba na ang karanasan ng mga bata sa media kumpara sa nakaraang mga henerasyon. Ibinahagi rin niya na kabilang sa mga programang pinanonood niya noong bata pa siya ang “Sesame Street.”
Kaugnay nito, ipinaliwanag ni Angara na kailangang suriin kung paano ginagamit ang mga makabagong platform at kung paano mapangangalagaan ang mga bata sa kanilang paggamit ng teknolohiya. Isa sa mga hakbang na binanggit niya ang paghihigpit sa paggamit ng cellphone sa loob ng mga silid-aralan.
Tinukoy rin ng kalihim ang mga insidente ng karahasan sa mga paaralan na iniuugnay sa nihilistic violent extremism, gayundin ang mga hamong may kinalaman sa kalusugang pangkaisipan ng mga mag-aaral.
Ayon kay Angara, maaaring makatulong ang sining bilang paraan ng therapy, habang dapat manatiling nakasentro sa pagkatuto ang edukasyon sa halip na umasa sa mga algorithm na ginagamit ng mga digital platform.
Binigyang-diin din niya na tungkulin ng pamahalaan na pangalagaan ang mga bata at protektahan ang kanilang kinabukasan, alinsunod sa direktiba ni Pangulong Ferdinand Marcos Jr.
Matapos ang kanyang mensahe, lumagda si Angara kasama ang mga opisyal ng NCCT sa Commitment Wall bilang pagpapakita ng suporta sa layunin ng kumperensiya.
Sa kanyang video message, pinuri naman ni Pasig City Lone District Rep. Roman T. Romulo ang NCCT sa pagsasagawa ng kumperensiya. Umaasa siyang magiging makabuluhan, produktibo at masigla ang mga talakayan tungkol sa kapakanan ng mga bata sa larangan ng media.
Ipinahayag din ni Senador Risa Hontiveros sa kanyang video message na naipasa na sa Senado ang Batang Ligtas o SAGIP Bill. Binanggit din niya ang pagpasa sa Senado ng panukalang batas laban sa online sexual abuse or exploitation of children (OSAEC) at child sexual abuse or exploitation materials (CSAEM).
Samantala, ibinahagi ni NCCT Chairperson Dr. Luis Gatmaitan ang mga resulta ng online survey ng konseho noong panahon ng COVID-19 pandemic mula 2020 hanggang 2022.
Ayon kay Gatmaitan, patuloy na nagbabago at dumarami ang mga platform na ginagamit ng mga bata sa panonood ng nilalaman. Dahil magkakaiba ang kanilang pinapanood, kailangan ding isaalang-alang ang iba’t ibang paraan ng paggabay sa kanila.
Ipinaliwanag din niya na magkaiba ang layuning pang-edukasyon ng isang programa at ang aktuwal na pagkatutong naidudulot nito sa mga bata.
Binigyang-diin din ni Gatmaitan ang kahalagahan ng Republic Act No. 11930, o ang Anti-Online Sexual Abuse or Exploitation of Children (OSAEC) and Anti-Child Sexual Abuse or Exploitation Materials (CSAEM) Act, na nilagdaan bilang batas noong Hulyo 30, 2022. Layunin nitong magtakda ng mga pananggalang laban sa pang-aabuso at pagsasamantala sa mga bata sa online na kapaligiran.
Sa usapin naman ng AI, sinabi ni Gatmaitan na maaari itong maging kapaki-pakinabang na kasangkapan, ngunit dapat iwasan ang labis na pagdepende rito.
Binigyang-diin niya na kailangang pagtuunan ng pansin ang tatlong pangunahing prayoridad sa media para sa mga bata: makabuluhang access, wastong paggabay at kaligtasan, at kalidad ng nilalaman at pagkatuto.
Itinatag ang NCCT noong 1997, bago pa lumaganap ang social media. Sa pamamagitan ng kumperensiya, layon nitong palakasin ang talakayan at pagtutulungan ng mga kinauukulan upang matiyak na ang mga batang Pilipino ay may access sa ligtas, de-kalidad at makabuluhang media content sa harap ng patuloy na pagbabago ng teknolohiya.
