SAN JUAN CITY – Nagpahayag ng suporta ang mga dating pinuno at opisyal ng AFP at PNP mula sa iba’t ibang administrasyon (Arroyo, Aquino, Duterte, at Marcos) para sa pagtakbo sa Senado ni Col. (Ret.) Ariel Querubin. Naganap ang pagtitipon sa Club Filipino noong Hulyo 8 upang ipakita ang kanilang pagkakaisa at pag-endorso kay Querubin, na kilala rin bilang “Push-Up Man,” sa gitna ng mga isyu sa West Philippine Sea at pambansang seguridad.
Sa event na pinamagatang “A Gathering of Warriors,” mahigit 2,000 dating heneral at opisyal ng AFP at PNP ang pumirma ng manifesto para suportahan si Querubin. Pinuri nila ang kanyang karera sa militar, dedikasyon sa serbisyo publiko, at pananaw para sa nagkakaisang Pilipinas.
Pinuri nang Retiradong Adm. Ramon C. Liwag si Querubin sa pamamagitan ng isang tulang isinulat niya, na nagsasaad ng kahandaan ni Querubin na ialay ang kanyang buhay para sa bansa. Ang manifesto, na binasa ni Diwa, ay binigyang-diin ang kanilang walang pag-aalinlangang suporta sa adbokasiya at paniniwala ni Querubin.
Binanggit din ang kontribusyon ni Querubin noong panahon ng pandemya ng Covid-19 at ang kanyang mga tagumpay sa militar, lalo na sa Mindanao. Sina Retiradong Maj. Gen. Benjamin Defensor at Adm. Edmon Tan, parehong beterano ng EDSA 1 at EDSA 2, ay mariing inendorso si Querubin, na inilarawan bilang pinakamarangal na sundalo sa kasaysayan ng bansa.
Si Querubin, na tumanggap ng Medal of Valor, ay nagsalita tungkol sa kanyang paglalakbay sa iba’t ibang administrasyon at ang mga paghihirap na dinaranas ng mga Pilipino. Binanggit niya ang pangangailangan para sa nasyonalismo at paghahanap ng kaluluwa ng bansa.
Nagpahayag si Querubin ng pasasalamat sa mga sumusuporta sa kanyang pagtakbo sa Senado sa Mayo 2025 mid-term elections. Binanggit niya na bukas siya sa alyansa sa ibang partido at mas pinipili ang diplomatikong solusyon sa isyu ng West Philippine Sea kaysa sa digmaan.
Kung mahalal, plano ni Querubin na palakasin ang Magna Carta para sa Kababaihan, pagbutihin ang kapakanan ng mga OFW, at suportahan ang sektor ng agrikultura. Pabor din siya sa pag-amyenda ng 1987 Philippine Constitution sa pamamagitan ng Constitutional Convention.
