MANILA, Philippines — Nanawagan ang Kingdom Keepers, isang grupo na binubuo ng mga taong may iba’t ibang tradisyong panrelihiyon, para sa patas at pantay na hustisya kasunod ng desisyon ng Sandiganbayan Third Division na pagkalooban ng provisional liberty si dating senador Ramon “Bong” Revilla Jr.
Sa kanilang public statement na pinamagatang “A Call for Conscience,” sinabi ng grupo na ikinababahala nito ang July 31, 2026 resolution ng anti-graft court, lalo na’t nananatili sa detention ang ilang kapwa akusado ni Revilla.
Iginiit ng Kingdom Keepers na dapat pantay ang pagpapatupad ng batas at hindi dapat naaapektuhan ng kapangyarihan o katayuan sa lipunan ang paghahatid ng hustisya.
Sinabi rin ng grupo na sinusuportahan nito ang hakbang ni Ombudsman Jesus Crispin Remulla na humiling ng reconsideration sa naging desisyon ng Sandiganbayan. Pinuri rin nito si Associate Justice Karl Miranda dahil sa kanyang dissenting opinion laban sa pagbibigay ng bail.
Samantala, sa majority ruling, pinaboran nina Associate Justices Fritz Bryn Anthony Delos Santos at Ronald Moreno ang provisional liberty ni Revilla. Ayon sa Sandiganbayan, hindi napatunayan ng prosekusyon na malakas ang ebidensiya laban sa dating senador para manatili siyang nakakulong habang dinidinig ang kaso.
Sa pahayag ng Kingdom Keepers, binanggit din nito ang alegasyon kaugnay ng ₱375 milyon na kickbacks. Gayunman, ang naturang alegasyon ay bahagi ng mga paratang sa kaso at hindi dapat ituring na pinal na hatol laban kay Revilla.
Hinimok ng grupo ang publiko na manalangin at manindigan para sa isang sistema ng hustisya na patas sa lahat, partikular sa mga mahihina at naaapi.
Nanawagan din ang Kingdom Keepers para sa patuloy na pagbabantay ng publiko sa mga usaping may kaugnayan sa korapsyon, pananagutan at integridad ng hudikatura.
