PASAY CITY — Inilunsad ng Technical Education and Skills Development Authority (TESDA) ang TESDA Skills Compass, isang bagong career guidance at skills-matching platform na layong tulungan ang mga Pilipino na makahanap ng angkop na career path at oportunidad sa trabaho.
Isinagawa ang paglulunsad kasabay ng 2026 National Tech-Voc Day Celebration through the World Café of Opportunities (WCO) noong Agosto 24 sa SM Mall of Asia Music Hall sa Pasay City.
Tinatayang 2,100 participants ang dumalo sa aktibidad, kabilang ang mga TVET graduates at alumni, jobseekers, returning Overseas Filipino Workers (OFWs), estudyante, employers, industry partners at Technical Vocational Institutions (TVIs).
Tampok sa WCO ang employer recruitment, on-the-spot interviews, hired-on-the-spot opportunities, career coaching at employment facilitation.
Lumahok din ang 45 employers, kabilang ang 30 employers na dumaan sa Public Employment Service Office (PESO) ng Pasay City at 15 industry partners para sa Enterprise-Based Training.
Ayon sa TESDA, makatutulong ang Skills Compass sa mga learner at jobseeker na tuklasin ang mga in-demand na trabaho, career pathways at kinakailangang skills, at maitugma ang kanilang kakayahan sa mga oportunidad sa labor market.
Bukod sa employment services, itinampok din sa aktibidad ang iba’t ibang skills demonstration at technology showcase, kabilang ang autonomous mobile robotics, animation, refrigeration and air conditioning, barista skills, latte art, flairtending, fruit carving, at table napkin at towel folding.
Sa ilalim ng temang “Connecting Skills. Guiding Careers. Creating Opportunities.”, binigyang-diin ng TESDA ang kahalagahan ng de-kalidad na technical-vocational education, pakikipagtulungan sa industriya, innovation at inclusive employment.
Isinulong din sa selebrasyon ang kampanyang “HUSAY • TIBAY • TAGUMPAY”—na kumakatawan sa husay ng mga manggagawang Pilipino, tibay at kakayahang umangkop sa pagbabago, at tagumpay sa pagkakaroon ng disenteng trabaho, negosyo at mas magandang kabuhayan.
Layunin ng aktibidad na mapataas ang employability ng mga TVET graduates at jobseekers, mapalawak ang ugnayan ng TESDA sa employers at industriya, at higit na maipakilala ang mga programa at serbisyo ng ahensya.
Kabilang sa mga inaasahang dumalo sa aktibidad sina TESDA Secretary at Director General Jose Francisco “Kiko” B. Benitez, TESDA Deputy Director General for Policies and Planning Rosanna A. Urdaneta, TESDA-NCR Regional Director Angelina M. Carreon, Pasay City Mayor Imelda “Emi” Calixto-Rubiano, SM Supermalls Vice President Junias M. Eusebio, at WILSEN International Managing Director Breyvan Tan.
