MANILA — Kinilala ng Philippine Institute for Development Studies (PIDS) ang tatlong natatanging research posters ng undergraduate at graduate students sa kauna-unahang Emerging Policy Research Poster Showcase, bahagi ng 2026 Annual Public Policy Conference (APPC).
Walong pag-aaral ang itinampok na tumalakay sa mga usapin sa ekonomiya, edukasyon, kalusugan, agrikultura, gender, at environmental sustainability. Pinili ng APPC Scientific Committee at supervising researchers ang top three batay sa kalidad ng pananaliksik at presentasyon.
Unang pwesto si Shierland Garcia ng Polytechnic University of the Philippines para sa “Challenges Experienced in Implementing Teaching Internship Program: Insights Across the Philippine Professional Standards for Teachers,” na tumalakay sa mga hamon sa teaching internship at pagpapalakas ng paghahanda sa mga magiging guro.
Ikalawang pwesto sina Danielle Francesca Marie Sanchez at TJ Robinson Moncatar ng University of the Philippines-Manila para sa pag-aaral tungkol sa mga karanasan at hadlang sa healthcare access ng mga taong may hemophilia sa Metro Manila.
Ikatlong pwesto sina Dianna Alba, Samantha Caseñas, Mark Rogelio, Raphael Winpeco, at Marites Tiongco ng De La Salle University-Manila para sa pag-aaral sa structural breaks ng ekonomiya ng Pilipinas at epekto nito sa output scarring, sovereignty, at economic resilience.
Tumanggap ang mga nagwagi ng P15,000, P10,000, at P5,000 para sa una, ikalawa, at ikatlong pwesto.
Kabilang naman sa iba pang shortlisted studies ang mga pananaliksik sa learning inequality sa Southeast Asia, mental healthcare sa Philippine carceral settings, youth engagement sa agriculture, market-based solutions sa reforestation, at faculty interaction at hybrid learning.
Napili ang walong poster mula sa PIDS call for research posters noong Hunyo hanggang Agosto para sa mga piling institusyon sa Socioeconomic Research Portal for the Philippines (SERP-P) Network at Philippine APEC Study Center Network (PASCN).
Iginawad nina PIDS President Dr. Philip Arnold Tuaño at Vice President Dr. Marife Ballesteros ang mga parangal, katuwang sina APPC Scientific Committee members Dr. John Paolo Rivera, Dr. Michael Ralph Abrigo, at Dr. Valerie Gilbert Ulep.
Layunin ng showcase na itaguyod ang policy research at mabigyan ng pagkakataon ang mga bagong mananaliksik na maibahagi ang kanilang pag-aaral sa mas malawak na policy community.
